سيناريو من مشهد واحد -ليل / خارجى ... شوارع بحرى الأسكندرية
تمر الترام الصفراء ذهابا وإيابا والشارع شبه خالى من المارة ويسيران على وحجاج سويا
على: بس أنت ماقولتليش ياحجاج هو أنت ليه ما أتجوزتش لغاية دلوقتى
حجاج: ودى مين اللى ح ترضى تتجوز واحد بالظروف الوحشة اللى زى ظروفى
على: مش لازم علشان تتجوز تبقى رشدى أباظة ولا حسين فهمى
حجاج:
رشدى أباظة أيه وحسين فهمى أيه أنا بتكلم على وحاشة الظروف مش وحاشة
الخلقة ... الخلقة دى بتاعت ربنا أنما الظروف اللى أنا بتكلم عنها دى كل
يوم والتانى متجرجر على أمن الدولة وتحقيقات وتعذيب وإهانة أتجوز واحدة
أبهدلها معايا ليه؟
على: (بصوت مرتفع) وأنت بياخدوك أمن الدولة ....
حجاج: (يشير له ليخفض صوته) بشويش يا على وطى حسك
على: طيب ... كنت بقولك أنت بياخدوك على أمن الدولة ليه؟
حجاج: أبدا حاجة بسيطة عشان بصلى
على: بتصلى أيه؟
حجاج: بصلى فى المسجد
على: يا سلام بس كده
حجاج: لا مش بس كده ... بجمع تبرعات للمحتاجين
على: يعنى أنت عاوز تفهمنى أنهم بيعذبوك وبيحبسوك بس علشان بتصلى وبتجمع تبرعات
حجاج: يا على مش أنا اللى عاوز أفهمك ... ده اللى هما كاتبينوه فى التهم الموجهة ليا وده اللى بيحققوا معايا فيه كل مرة
على: طب وهما أيه مشكلتهم أنك تصلى ولا تجمع تبرعات يا حجاج هو أنت بس اللى بتصلى ولا أنت بس اللى بتجمع تبرعات للمحتاجين
حجاج:
لا أصل أنا بصلى ورا أئمة ومشايخ ليهم توجهات معادية للنظام ومسألة جمع
التبرعات دى النظام بيرفضها لأنه ببساطة يا على عاوز الفقير يفضل فقير
علشان طول ماهو جعان طول ماهو سايب حقه ومش بيدور عليه عندهم مبدأ قذر زيهم
بيقول "جوع كلبك يتبعك" شفت يا على بصين لنا ازاى؟
على:
أنا معاك فى اللى بتقوله بس تفتكر كل ده يستاهل أنك تتسجن وتتعذب وتتهان
ياحجاج وتقضى عمرك كله مش قادر تتلم على بنت الحلال لأنك كل يوم والتانى فى
مقر من مقراتهم ده كلام يا حجاج ... وأنت عارف كويس ان اللى بتعمله ده مش ح
يغير حاجة من الحقيقة اللى أحنا عايشنها ولا ح يرفع حد من على كرسيه
حجاج:
ما أنت لو شفت لهفة أب على أبنه اللى محتاج يعمل عملية فى أسرع وقت
والدكاترة مش عاوزين يدخلوه العمليات إلا لما يدفع فلوس العملية والراجل
ممعاهوش يعمل ايه يا على واللى أتطرد من شغله علشان الشركة اتخصخصت
وممعاهوش يأكل عياله يعمل أيه ماتقولى ياعلى وغيره غيره وغيره يعملوا أيه
يا على
( تمر بجوارهما الترام فيركض حجاج خلفها ويقفز داخلها ويقف على الباب ويستمر فى حديثه لعلى) أضحى
بعمرى ياعلى وشعب مصر العظيم مايجوعش .... أضحى بروحى ياعلى وشعب مصر
العظيم مايتهانش .... مصر تستاهل يا على ... مصر تستاهل يا على .... مصر
تستاهل يا على ( يتأثر على بكلام حجاج فيبدأ بالإسراع نحو الترام ثم يركض ويقفز ويأخذ حجاج بالحضن فيبدأ حجاج بالبكاء)
Emad Mdayen
